सर्लाहीमा प्रहरी र विप्लव समुह बीच गोली हानाहान, जिल्ला इञ्चार्जको मृत्यु

सर्लाहीको लालबन्दीमा प्रहरी र नेत्रविक्रम चन्द (विप्लव) नेतृत्वको नेकपा कार्यकर्ताबीच दोहोरो गोली हानाहान हुँदा सर्लाहीका जिल्ला इञ्चार्ज कुमार पौडेलको मृत्यु भएको छ । पौडेलको साथबाट प्रहरीलाई गोली हानिएको सिक्स एमएमको रिभल्भर बरामद भएको छ भने झोलामा थ्री नट थ्री राइफल, गोली, कटुवा पेस्तोल पनि भेटिएको छ ।

नेपाल प्रहरीका प्रवक्ता डिआईजी विश्वराज पोखरेलका अनुसार लालबन्दीबाट लखनदेही जंगलहुँदै सिन्धुलीतर्फ दुईवटा मोटरसाइलमा सवार भएर गइरहेका ४ जनालाई प्रहरी रोक्न खोज्दा झडप भएको हो।

उनीहरुले प्रहरी माथि गोली चलाउन थालेपछि प्रहरीले पनि जवाफी कारवाही गरेको उनले दाबी गरे। विप्लवका कार्यकर्ताले प्रयोग गरेको ना २२ प ६४ निलो रंगको १५० सीसीको पल्सर र अनटेस्ट एफजेड मोटरसाइकल पनि प्रहरीले बरामद गरेको छ । अहिले थप प्रहरी परिचालन गरेर भागेका ३ जनाको खोजी भैरहेको छ ।